Topi Dosa Recipe

टोपी डोसा रेसिपी 

• डोसा साहित्य:

तांदूळ ३ वाटी, उडदाची डाळ दीड वाटी, खाण्याचा सोडा १ चमचा, कांद्याचे पापुद्रे (साल) ४ ते ५,मीठ चवीनुसार 

• डोसा कृती:

तांदूळ आणि उडिद डाळ सकाळी पाण्यात भिजवून ठेवावी. साधारणपणे ७ ते ८ तास भिजवल्यानंतर ते चांगले फुगून वर येतात. रात्री मिक्सर मधून त्यांचे चांगले बारीक वाटण करून घ्यावे. सर्वात पहिले तांदूळ बारीक करावे आणि नंतर उडीद डाळ काढावी. एका मोठ्या भांड्यात दोन्ही वाटण एकत्र करुन एकहाती फिरवत मिक्स करावे नंतर त्यात खाण्याचा सोडा पाण्यात मिक्स करून टाकावा. व्यस्थित एकत्र झालं कि शेवटी त्यावर कांद्याची साल अलगत ठेऊन झाकण ठेवा.  दुसऱ्या दिवशी सकाळी व्यस्थित आंबवलेले आणि फुगून वर आलेले मिश्रणातील कांद्याची साल काढून घ्या आणि नीट फेटून घेऊन आवश्यक वाटल्यास पाणी घालून नेहमीप्रमाणे त्याचे डोसे टाका. छान भाजून निघाल्यावर त्याला थोडासा चाकूने कट मारा आणि टोपीचा आकार द्या. तयार आहे तुमचा टोपी डोसा. 

• पंचडाळ सांबर साहित्य :  

तूर डाळ २ वाटी, सालाची मूग डाळ १/२ वाटी, मसूर डाळ १/२ वाटी, मुगाची पिवळी डाळ १/२ वाटी, थोडीशी हरभऱ्याची डाळ. १ मोठासा कांदा, २ छोटे टमाटे, एव्हरेस्ट चा सांबर मसाला, तिखट आवडीनुसार, धणेपूड १ चमचा, हळद १/२ चमचा, जिरे १ चमचा, मीठ चवीनुसार, गुळ १ छोटा तुकडा, चिंचेचा कोळ १/२ वाटी, तुमच्या आवडीच्या फळभाज्या बारीक कापलेल्या, गाजर एक छोटा तुकडा, शेवग्याच्या शेंगा ५  ते ६ तुकडे, तेल फोडणीसाठी ३  चमचे, साखर १ छोटा चमचा, हिरव्या मिरचीचे तुकडे ८ ते  १०,  बटर १ तुकडा, कोथिंबीर सजावटीसाठी आणि गोडलिंबाची कोवळी पाने दांडीसहित 

•  पंचडाळ सांबर कृती:

सर्वप्रथम सर्व डाळी व्यस्थित धुवून कुकरमध्ये तुमच्या आवडीच्या बारीक काप केलेल्या भाज्यांसोबत शिजवून घ्या. त्यात कांदा, टमाटा आणि मिरची सुद्धा टाका म्हणजे एकजिव करणे सोपे जाईल. साधारणपणे  ५ शिट्टयानंतर कुकर बंद करून वाफ दबू द्या. कढईत तेल आणि साखर टाकून तेल तापल्यानंतर त्यात जिरे, बारीक चिरलेला कांदा, टमाटा आणि हिरवी मिरची तुकडे टाकून चांगले परतून घ्या. तिखट, हळद, धणेपूड टाका. आता कुकरमधील शिजवलेले डाळी आणि भाज्यांचे मिश्रण एकजीव करून आवश्यकतेनुसार पाणी टाका व कढईतील फोडणीत हळूहळू सोडा. छान उकळी आली कि त्यात गुळ, चिंचेचा कोळ, अमूल बटर आणि सांबर मसाला टाकून आणखी उकळू द्या. १५ मिनिटे उकळल्यानंतर कोथिंबीर आणि गोडलिंबाचे पान टाका. तुमचा पंचडाळ सांबर तयार. 

• बटाट्याची भाजी साहित्य: 

३ ते ४ मोठे बटाटे, १ मोठा बारीक चिरलेला कांदा, हिरवी मिरची तुकडे ९ ते १०  काप करून, गोडलिंबाची पाने ५ ते ६, हळद १/२ चमचा, आलं १ तुकडा बारीक चिरून, कोथिंबीर बारीक चिरलेली १ वाटी, मोहरी १ चमचा, तेल फोडणीसाठी. 

• कृती:  

कुकरमध्ये बटाटे छोटे काप देऊन उकडून घ्या, कढईत फोडणी करून त्यात बारीक चिरलेला कांदा, मिरचीचे तुकडे, आलं आणि गोडलिंबची पाने टाकून परतून घ्या. हळद टाकून उकडलेले बटाटे स्मॅश कुरून फोडणीत टाका. भाजी व्यस्थित परतून शिजल्यावर बाजूला काढून ठेवा. 

• हरभऱ्याच्या डाळीची चटणी :

आंबट दही २ वाटी, हरभऱ्याची भिजवलेली डाळ १ वाटी, तिखट आवडीनुसार, साखर २ चमचे, थोडीशी हळद, फोडणीसाठी तेल आणि जिरे १ चमचा.    

• कृती:

हरभऱ्याची डाळ मधून बारीक वाटून घ्या. दही चांगले फेटून त्यात ती डाळ  मिक्स करा. एका छोट्या वाडग्यात काढून घ्या. कढईत तेल गरम करून जिरे टाका नंतर थोडे कोमट झाल्यावर त्यात तिखट, हळद, साखर  आणि हिंग टाकून वरून तयार चटणीच्या मिश्रणाला चरचरीत फोडणी घालून कोथिंबीर ने सजवून सर्व्ह करा.