#आमचीsssssमुंबई
"काय हे मुंबईत आलीस आणि मुंबईचा वडापाव नाही खाल्लास," मग तू कसली ग खादाडी ? असं माझं मन मलाच खात होत कालपासुन 😢 पण करणार काय इलाज नव्हता. कारणही तसंच होत.
आत्तापर्यंतच्या आयुष्यात पहिल्यांदाच मी मुंबईत आली अबाबो ! किती उंच इमारती डोक्यावरची टोपी नक्कीच खाली पडली असती 👍, सगळीकडे उड्डाणपुलांचे जाळे, सतत धावपळ करणारी माणसे, जवळून भुर्रर्कन जाणारी वाहने हे सगळं मी पहिल्यांदाच दूरचित्रवाणी सोडून प्रत्यक्ष अनुभवत होती.
स्वागताला म्हणायला 10 मिनिटांचा धो धो पाऊस व ट्रॅफिक जाम नंतर पुन्हा सगळं सुरळीत सुरु. शेवटी पोहोचलो बाबा निश्चित स्थळी पश्चिम विक्रोळी ला, गोदरेज कंपनीच्या रेसिडेंशील वसाहतीत 🙂 .
पहाताच क्षणी डोळ्यांना दिसणारी सुंदर हिरवाई, अधूनमधून लपाछपी खेळणारा उनाड आणि द्वाड पाऊस, शिस्तीने परेड करणारी अशोकाची, जांभळाची कडुलिंबाची, बुचाची इ. झाडे. बघून मन टवटवीत झाल्यासारखे वाटले. संध्याकाळमुळे जेवढे दिसले ते पण मनाला आनंदून गेले. संपूर्ण घरांची वसाहात गर्द झाडींनी वेढलेली आहे. जणू काही एखाद्या हिल स्टेशन वरच्या रिसॉर्ट मधेच आलोय असं वाटत होत.
रात्री काकूंच्या हातच गरमागरम जेवण करून मस्त झोप लागली. सकाळी जाग आली तीच मुळी पोपट, कावळे, मैना, साळुंख्या, चिमण्या यांच्या किलबिलाटांनी .
" पहाटे लाही जाग यावी, इवली किलबिल कानी पडावी। थंडीची चादर ओढून, पाऊस येतो गिरक्या मारून ।।
जणू म्हणत असावेत," उठा हो पाहुणे सकाळ झाली". पावसाचा लपंडावचा खेळ सुरूच झाला जणू रात्रीपुरती time plz घेतली होती. सगळं छान चालू होत.
पण मला मात्र मुंबई किंग वडापाव ची खूपच आठवण येत होती😢
"काश मेरे पास जिनी होता तो मेरी ख्वाहिश," जो हुक्म मेरे आका", म्हणताच पूर्ण झाली असती. " असो माझ्या "हक्काचा जिनी" तर झोपला होता😛
पण झाली बाई इच्छा पूर्ण 😁राहवलं नाही मला शेवटी म्हंटल दिरांना , "मला मुंबईचा वडापाव खायचा आहे". मग काय आणला त्यांनी😊.
माझ्यासाठी तर, "आनंदीआनंद गडे जिकडेतिकडे वडापावच दिसे". असे झाले होते.
अहाहा काय वर्णावे ते रुपडे लोभस, गुबगुबीत सोनेरी कांती, भरीव मुद्रा तीसुद्धा लुसलुशीत आणि मऊ पांढऱ्याशुभ्र आसनावर विराजमान झालेली. राजाला नजर नको लागायला, म्हणून पुदिना,कोथिंबीर,आलं, लसूण आणि लाल तिखटाची चटणी " तीट "म्हणून .😊
डोईवर तळलेल्या हिरव्या मिरचीचा, मिठाच्या खड्यांनी सजवलेला जणू हिरेजडित मुकुटच. तो तर त्याच्या बादशाहीपणा ची साक्षच देत होता.
त्यातून येणाऱ्या सुगंधापुढे तर जगातील सर्वात महागडे आणि सुवासिक अत्तर देखील मला फिके वाटते.
असो तर झाली आमची सुवर्णभेट तोही अगदी मुंबईतुन प्रयाण करण्याच्या आधी सुवर्णमध्य गाठून.
अच्छा तर गुड बाय मुंबईकर✋ नमस्कार तुमच्या ट्रॅफिक मधील परीक्षा बघणाऱ्या संयमाला 🙏 आणि माझा लाडका खाद्यपदार्थांचा बादशहा प्रिय वडापाव मिस you😢 तुला.
सौ. मधुरा देशपांडे ( एक पोटातून वडापाव प्रेमी )