Dal Bitti & Wangyachi Bhaji Recipi

साधं वरण ,वांग्याची भाजी आणि बिट्टी 

साहित्य:

* बिट्टी तयार करण्यासाठी: 

२ वाट्या कणिक (गव्हाचे पीठ), १ वाटी रवा, १ चमचा जिरे, १ चमचा ओवा, तेलाचं मोहन ३ चमचे, १/२ चमचा खाण्याचा सोडा, मीठ चवीनुसार , तळण्यासाठी तेल, पाणी आवश्य कतेनुसार,बिट्टी वाफवण्यासाठी इडलीपात्र 

* साध्या वरणासाठी :

तुरीची कुकरमध्ये शिजवलेली डाळ २ वाटी, साजूक तूप १/२ वाटी, हिंग १ चमचा, मीठ चवीनुसार,

* वांग्याच्या भाजीसाठी:

४ ते ५ काळे अथवा जांभळे वांगे, मोहरी १ चमचा, धणेपूड, जिरेपूड प्रत्येकी २ चमचा, हळद १/२ चमचा, काळा मसाला १ चमचा, तेल फोडणीसाठी २ पळी, तिखट आवडीनुसार, मीठ चवीनुसार 

कृती :

एका वाडग्यात कणिक, रवा, जिरे, ओवा,खाण्याचा सोडा आणि मीठ टाकून हाताने एकजीव करा. नंतर तेलाचं मोहन टाकून हळूहळू पाण्यासोबत कणिक घट्ट मिळून घ्या. १५ मिनिटे झाकून ठेवा. नंतर त्याचे साधारण थोडे मोठे गोळे करून जाडस पुरी लाटा. तिला आतून तेल लावून घडी घाला, पुन्हा तेल लावून त्रिकोणी आकार तयार करा व तिन्ही बाजूनी हातानी हलका दाब देऊन कडा बंद करा.

इडलीपात्रात पाणी टाकून वाफेवर ह्या तयार केलेल्या बिट्ट्या साधारणपणे १५ मिनिटे वाफवून घ्या. नंतर काढून घेऊन गार झाल्यावर सोनेरी रंगावर खरपूस तळून घ्या.
*साधं वरण कृती:
कुकर मध्ये तुरीची डाळ चांगली शिजवून घ्या. एकजीव केल्यावर त्यात हिंग आणि साजूक तुपाची फोडणी देऊन कढईत १० मिनिटे उकळू द्या. झाकण ठेऊन वाफ दाबा. 
*झणझणीत वांग्याची भाजी:
वांगी उभ्या फोडी करून चिरा व लागलीच पाण्यात बुडवून ठेवा. म्हणजे काळी पडणार नाही. कढईत तेल गरम करून मोहरी फुटल्यावर त्यात धणेपूड, हिंग,जिरेपूड, तिखट आणि काळा मसाला तेलावर परतून घ्या. नंतर वांगी टाकून झाकण ठेऊन एक वाफ काढा. थोडेसे पाणी टाकून छान मंद आचेवर शिजू द्या. शिजल्यावर शेवटी मीठ टाकून  भांड्यात काढून घ्या. 

सर्व तयार झाल्यावर जेवताना भाजी आणि वरण गरम करून तुपाच्या छोट्या वाटीसह खायला द्या.