Hrbharyaachi Kachori

हरभऱ्याची कचोरी 

साहित्य :

२ वाट्या हरभऱ्याचे सोललेले दाणे, लसूण पाकळ्या ८ ते १०, हिरव्या मिरचीचा ठेचा ३ चमचे, मीठ आवश्यकतेनुसार, तिखट आवडीनुसार, धणेपूड १ चमचा, जिरे १ चमचा, तेल तळण्यासाठी, कांदा बारीक चिरलेला १ वाटी, मैदा ३ वाटी, पाणी आवश्यकतेनुसार.  

कृती:

एका मोठ्या कढईत २ चमचे तेल टाका. तेल तापल्यावर त्यात हरभरा, कांदा, लसूण, तिखट, धणेपूड, जिरे आणि हिरव्या मिरचीचा ठेचा टाकून व्यस्थित परतून वाफ येण्यासाठी झाकण ठेवा. साधारणपणे १५ मिनिटे चांगलं परतल्यावर कढईतून काढून घेऊन थंड होण्यासाठी काहीवेळ तसेच ठेवा.

तोपर्यंत एका वाडग्यात मैदा, जिरे आणि तेलाचं मोहन टाकून घट्ट मळून घेऊन १० मिनिटे झाकून ठेवा.

हरभऱ्याचे मिश्रण थंड झाल्यानंतर मिक्सर मध्ये साधारण बारीक वाटून घ्या. तयार मैद्याच्या गोळ्याची पुरी लाटून त्यात हरभऱ्याचे सारण भरून हाताने हलके दाबून गोलाकार आकार द्या.  

कढईत तळण्यासाठी तेल गरम करून त्यात सारण भरलेल्या कचोऱ्या हळूहळू सोडा. 

छान सोनेरी रंगावर आल्या कि अतिरिक्त तेल निथळू देऊन दह्याच्या चटणीबरोबर गरमागरम खायला द्या.